२३ जना कामदारसँग पैसा लिएर म्यानपावर कम्पनी फरार
काठमाडौँ, २०, पुस । वैदेशिक रोजगारीमा खाडी तथा मलेसिया लगायत देशहरूमा पठाइदिने भनेर कामदारसँग प्रतिव्यक्ति २० हजारदेखि २ लाख रुपैयाँसम्म लिएर एक म्यानपावर कम्पनी फरार भएको छ ।
काठमाडौंको वनस्थलीमा रहेको ग्लोबल प्राइभेट लिमिटेडले कामदारहरूलाई कुवेत, कतार, साउदी, मलेसिया लगायत देशमा पठाइदिने भनेर ठगी गरी फरार भएको हो । उक्त म्यानपावरविरुद्ध वैदेशिक रोजगार विभागमा उजुरी पनि परेको छ ।
म्यानपावरले ठगी गरेको भन्दै २३ जनाले विभागमा उजुरी दिएका हुन् । गोरखाका विष्णु नेपालीले कुवेतमा हाउस किपिङ कामका लागि भनेर ७० हजार रुपैया बुझाएको बताए । ‘यही बुधबार उडाउँछु’ भनेर सबै कामदारसँग पैसा लिएको भन्दै पीडितहरूले विभागमा उजुरी दिएका हुन् ।
