मलेसियामा बढेको न्यूनतम तलब जुलाईदेखि लागू हुने
काठमाडौँ, १४, पुस । ५ जनाभन्दा कम श्रमिक भएका मलेसियाका कम्पनीहरूले बढेको आधारभूत पारिश्रमिक सन् २०२३ को जुलाईदेखि मात्र लागू गर्न त्यहाँकाे मानव संशाधन मन्त्रालयले जनाएको छ ।
विभिन्न सरोकारवाला निकायसँगको २ पक्षीय छलफलका आधारमा यो निर्णय गरिएको मलेसिया सरकारले जनाएको छ । मलेसिया सरकारले ५ जनाभन्दा कम श्रमिक भएका कम्पनीलाई छुट दिँदै जुलाईदेखि बढेको आधारभूत परिश्रमिक दिँदा हुने निर्णय गरेको हो ।
कोरोना महामारीलगायत कारण आर्थिक संकट झेलिरहेका साना कम्पनीका लागि मलेसियन सरकारले २०२३ को जनवरी १ देखि श्रमिकको पारिश्रमिक बढाउनुपर्ने भनेको थियो । तर फेरि ६ महिना समय थप गर्दै जुलाईदेखि मात्र बढेको न्यूनतम पारिश्रमिक लागू गर्न भनेको हो ।
मलेसियामा गएको मे महिनादेखि नै न्यूनतम तलब बढेर १५ सय मलेसियन रिंगिट लागू भएको छ । ५ जनाभन्दा बढी श्रमिक भएका कम्पनीले भने मे १ गतेदेखि नै यो नियम कार्यान्वयन गरिसकेका छन् ।
जुलाईअघिसम्म ५ जनाभन्दा कम श्रमिक भएका रोजगारदाताले ११ सयदेखि १२ सय रिंगिट तलब दिनुपर्नेछ । तर ५ जनाभन्दा बढी श्रमिक भएका रोजगारदाताले भने १५ सय रिंगिटभन्दा कम तलब दिन पाउने छैनन् ।
